ជំងឺថ្លើម

ជំងឺថ្លើម

ជំងឺថ្លើម

៩០ភាគរយនៃអ្នកជំងឺថ្លើមប្រភេទ B មិនមានលេចចេញរោគសញ្ញាអ្វីទេ ដែលជាហេតុធ្វើឱ្យអ្នកជំងឺច្រើនតែហួសពេលក្នុងការព្យាបាលព្រោះឈានដល់ជំងឺក្រិនថ្លើម ឬមហារីកថ្លើម។ មានសំណួរជាច្រើនបានលើកឡើងថា តើជំងឺថ្លើមប្រភេទ B អាចឆ្លងតាមរយៈការរួមភេទដែរឬទេ ?

ជួបជាមួយលោកវេជ្ជបណ្ឌិត អ៊ុង ចក្រាវុធ ប្រធានផ្នែកជំងឺថ្លើម ក្រពះ ពោះវៀន និងជំងឺឫសដូងបាតនៃមន្ទីរពេទ្យកាល់ម៉ែត បានប្រាប់កោះសន្តិភាពថា ជំងឺថ្លើមប្រភេទ B គឺជាជំងឺឆ្លងយ៉ាងសកម្មបំផុតនៅក្នុងពិភពលោកដែលកំពុងធ្វើឱ្យមានការព្រួយបារម្ភយ៉ាងខ្លាំងក្នុងបញ្ហាសុខភាពសាធារណៈ ជាពិសេសនៅក្នុងតំបន់អាស៊ីអាគ្នេយ៍ ក្នុងនោះមានប្រទេសកម្ពុជាផងដែរ។ ជំងឺថ្លើមប្រភេទ B មានបង្កប់នៅក្នុងឈាម ទឹកមាត់ ទឹកដោះម្តាយ និងទឹករំអិលផ្សេងៗទៀតក្នុងខ្លួនមនុស្ស ហើយក៏អាចឆ្លងដោយងាយ ស្រដៀងគ្នាទៅនឹងការឆ្លងមេរោគអេដស៍ផងដែរ ។ ដោយការឆ្លងនេះតាមរយៈឈាមដូចជាការរួមភេទ ពេលសម្រាលកូន ការប្រើប្រាស់សម្ភាររួមគ្នា ដូចជាច្រាសដុសធ្មេញ កន្ត្រៃកាត់ក្រចក ម្ជុលចាក់ថ្នាំរួមគ្នាជាដើម ។ ជាពិសេស ជំងឺនេះក៏អាចឆ្លងតាមរយៈទឹកមាត់ ញើស ការប្រើប្រាស់របស់របររួមគ្នាជាមួយនឹងអ្នកជំងឺថ្លើមប្រភេទ B នេះផងដែរ ។

ជំងឺថ្លើមប្រភេទ B អាចបណ្តាលឱ្យមានផលប៉ះពាល់យ៉ាងខ្លាំងអាចធ្វើឱ្យបាត់បង់ជីវិត ដែលមកដល់សព្វថ្ងៃនេះ មិនទាន់មានថ្នាំព្យាបាលសម្លាប់មេរោគនេះឱ្យអស់នៅឡើយទេ ដូចគ្នានឹងជំងឺអេដស៍គ្រាន់តែអាចព្យាបាលពន្យារអាយុជីវិតបានប៉ុណ្ណោះ ។ តែជាភ័ព្វសំណាងព្រោះជំងឺនេះមានវ៉ាក់សាំងចាក់បង្ការទប់ស្កាត់បាន១០០ភាគរយ ។

ថ្លើមគឺជាសរីរាង្គមួយដ៏សំខាន់សម្រាប់មនុស្ស។ ប្រសិនបើថ្លើមមានកើតជំងឺធ្ងន់ដែលមិនអាចព្យាបាលបានដូចជាជំងឺថ្លើមប្រភេទ B នោះ វាពិតជាធ្វើឱ្យលោកអ្នកមានកង្វល់យ៉ាងខ្លាំង ព្រោះថាជំងឺនេះអាចឆក់យកអាយុជីវិតរបស់លោកអ្នកបានគ្រប់ពេលវេលា បើទោះជាជំងឺនេះមានថ្នាំពន្យារអាយុជីវិតក៏ពិតមែន ប៉ុន្តែវាជាជំងឺកាចសាហាវ ៕

Comments